Book 11, page 90 – Ants
Achi huei, quipanahuia in tlatauhqui, cenca izozic, achi chichiltic: auh iuhquin tlatlactomio, atle itequiuh zan monenemitia: inic mihtoa icel azcatl, zan icel in nenemi, amo ontematinemi, amo no eheteietinemi, iuhquin oc cequin azcameh, tel miequin, mieccan itto, namico, cenmatinemi.
Itech mihtoa cuahuitl, ihuan azcatl: ipampa cuauhtitech, cuauhpalanitech yoli, in tlacati: auh inic huei quipanahui, quinenehuilia in tlatlahuic azcatl, melacpol, mahuihuicequi achi tlatlauhque, in ochicahuaque: no tecuani, no iztlaque, no iuhquin tlatlahuic azcatl, zan huel no iuhquin in icel azcatl.
Itech mihtoa in cuitlatl, ihuan azcatl: ipampan cuitlayac, ini cequi achi nextique, camiltique, cequi cozyayactique: oncan tlacati in metzonco, in cuitlatitlan in tlazoltitlan: no tequapipiloa, no tetoneuhque. Auh amo zan quezquin nemi: cenca miequintin nemiololiuhtinemi: auh inic otlatoca, zan motecpana, mohuipana, patlahuatihui: anozo zan cenpanti.
No itoca tzicatl yehuantin in tlaitztiaya nemi tepitoton; tlallan, metzonco in tlacati: auh no tecuanipipil. Auh in icuac xopa: motataca manilla in ipilhoa, iztaque iuhquin iztac ocuilton: cualo, huelique, miequin mopaoaci: huel intoca tzicameh, anozo mihtoa azcamolli.
Leave a Reply